ការវាយប្រយុទ្ធគ្នា រវាងកងទ័ព របស់សាធារណៈរដ្ឋខ្មែរ របស់សេនាប្រមុខលន់ នល់ និងកងទ័ពខ្មែរក្រហម ត្រូវបានមើលឃើញ និងលាន់ឮស្ទើរពេញ មួយយប់ នៅយប់ថ្ងៃទី១៦ មេសា ១៩៧៥។
កងទ័ពក្រហមបានបើករណៈសិរ្យ គ្រប់ទិសទាំងបួនហើយខ្លាំង បំផុត គឺនៅតាមផ្លូវជាតិលេខ០១។ ដោយកងទ័ពសាធារណៈ រដ្ឋខ្មែរត្រៀមចុះចាញ់ និងមានការបាញ់តបរប៉េះរប៉ោះកងទ័ព ខ្មែរក្រហម ក៏បានចូលលុកលុយទីក្រុងភ្នំពេញ នៅវេលា ម៉ោង ០៧និង ៣០នាទីព្រឹក ថ្ងៃទី ១៧ មេសា ១៩៧៥។ នៅម៉ោងប្រហែលជា ១០ព្រឹក ថ្ងៃទី១៧ មេសា ខ្មែរក្រហម បានកាន់កាប់ទីក្រុងបានទាំស្រុង។
ទង់ជាតិរបបសាធារណៈរដ្ឋខ្មែរ របស់លោកសេនាប្រមុខលន់ នល់ ដែលមានផ្ទៃពណ៌ខៀវ និងជ្រុងម្ខាងរូបប្រាសាទអង្គរវត្ត កំពូលបី ពណ៌ស និងផ្ទៃជុំវិញ ពណ៌ក្រហម ហើយជ្រុងខាងលើ មានសញ្ញាផ្កាយ ព័ណសចំនួន៣ បានត្រូវទាញទំលាក់ ជាមួយនឹងបទចំរៀងជាតិ ដោយជំនួសមកវិញ ទង់ជាតិនិងភ្លេងជាតិរបស់របបកម្ពុជាប្រជាធិបតេយ្យ។
ទង់ជាតិរបបកម្ពុជា ប្រជាធិបតេយ្យ ត្រូវបាន បង្ហូតឡើង ទង់ជាតិ នេះ រំលិចដោយផ្ទៃ ពណ៌ក្រហម និងរូបប្រាសាទកំពូលបី ពណ៌លឿង នៅចំកណ្ដាល។ ផ្ទៃពណ៌ក្រហម តំណាងឲ្យ ចលនាបដិវត្ត មានន័យថា បូជាជិវិត ដ៏មុះមុត និងអង់អាចក្លាហាន ដើម្បីប្រជាជនកម្ពុជា រំលោះប្រទេស ការពារ និងកសាងប្រទេស។
ផ្ទៃប្រាសាទកំពូល បី ពណ៌លឿងជានិមិត្តរូប នៃប្រពៃណីជាតិរបស់ប្រជាជនកម្ពុជា ដែលបានការពារ និងកសាងប្រទេសឆ្ពោះទៅរកភាពរុងរឿង មហាលោតផ្លោះ មហាអស្ចារ្យ។
ប្រជាជនទីក្រុងភ្នំពេញ ឬគេហៅថា អ្នក ១៧ មេសា រាប់សែនាក់ ត្រូវ បានទ័ពខ្មែរក្រហមគៀរ និងបង្ខំឲ្យចាកចេញទីក្រុង។ មានរទេះគោ រទេះសេះ រ៉ឺម៉ក ម៉ូតូ អ្នកដើរថ្មើជើង ចេញដើរតាមផ្លូវ ចេញពីទីក្រុង ប៉ុន្តែភាពនិរាសគ្រួសារក៏ចាប់ផ្ដើម ប្រពន្ធបាត់ប្ដី ម្ដាយព្រាត់កូន កូន ព្រាត់ឪពុក បងបាត់ប្អូន ចៅ បាត់ ជីតា ជីដូន បាត់ចៅ បានកើតមានស្ទើរគ្រប់កន្លែង។ អ្នកខ្លះរត់ទៅស្រុកកំណើត អ្នកខ្លះ ដេករង់ចាំថ្ងៃត្រឡប់ចូលក្រុងវិញ តែទីបំផុតមានតែនិរាសន៍ និង ព្រាត់ប្រាស់គ្នា។
ភាពខ្មៅងងឹត និងសោកនាដកម្ម កាន់តែធំធេង និងឈឺចាប់។ សាកសពទាហាន របស់សាធារណៈ រដ្ឋ និងជនស៊ីវិល ត្រូវគេប្រទះឃើញ ស្លាប់ជាច្រើននៅពាសវាលពាសកាល និងតាមដងផ្លូវ។ ឈាមរបស់ខ្មែរចាប់ហូរកើតជាថ្លុកឈាម ថ្ងៃនោះមក។
ប៉ុន្តែក្រោយបន្តិចខ្មែរហាក់ដូចបាន សន្តិភាព ជាមួយនឹងការធ្វើសមាហរណកម្ម រវាងអ្នកទីក្រុង គេហៅថា ១៧ មេសា និងអ្នកជនបទ គេហៅពួកមូលដ្ឋាន។ រយៈពេលប៉ុន្មានខែប៉ុណ្ណោះ ខ្មែរក្រហម បានបង្កើតសហករណ៍មូលដ្ឋានបានដោយជោគជ័យ។
អ្នក ១៧ មេសា ច្រើនជានិស្សិត បញ្ញវ័ន្ត ត្រូវគេស្នើឲ្យចុះស្រែដកស្ទូង និងកាន់នង្គ័ល ព្យួររាស់។ នៅពេលនោះ ទីផ្សារ និងកម្មសិទ្ធឯកជនត្រូវបានលុបបំបាត់។ កម្ពុជាប្រជាធិបតេយ្យ ឬ ខ្មែរក្រហម ចាប់ផ្ដើមពង្រឹង វណ្ណៈកសិករ ដែលពាក្យស្លោករបស់ខ្មែរ ក្រហម សរសេរថាកសិករគឺជាវណ្ណៈ អធន់ និងឈានមុខគេ ដែលសាកសម និងបទចំរៀងរបស់ខ្មែរក្រហម មួយបទដែលមានអត្តន័យ ដូចបទចំរៀង “កសិករ របស់ខ្មែរក្រហម”។
ក្រោយពីស្ថានការណ៍យោធា បានស្ងប់ស្ងាត់ប្រទេសជាតិទាំងមូល ត្រូវបានទាញទំលាក់ ក្នុងជំរុំលត់ដំពលកម្ម។ ការងារពលកម្ម ចាប់ផ្ដើម ធ្វើនៅពេលថ្ងៃរះ រហូតដល់ពេលថ្ងៃលិច ។ ក្រុមណា មិនអាច បញ្ចប់ការងារទាន់ ផែនការ ដែលដាក់ចុះ ដោយថ្នាក់លើ នឹង មិនត្រូវបានអនុញ្ញាតិឲ្យសម្រាកនោះទេ។
ប៉ុន្តែនៅក្នុងជំរុំលត់ដំពលកម្ម គេឃើញមានការសំដែងសិល្ប ល្ខោន រឿង និយាយអំពី យុទ្ធជនខ្មែរក្រហមជាជនអង់អាច ក្លាហានតែមួយគត់ ដែលហ៊ាន ពលីជិវិត ដើម្បីបុព្វហេតុប្រទេសប្រយុទ្ធប្រឆាំង នឹងបនចក្រព័ត្រអាមេរិក ហើយអត្តន័យដូចបទ “យុទ្ធជន តស៊ូ ដើម្បី បុព្វហេតុប្រទេស” ។
ជាមួយនឹងការធ្វើសមាហរណកម្ម ទៅជារបបសមូហភាព និយម បានដោយជោគ ជ័យ ហើយនោះ ឃើញថា រដ្ឋាភិបាល កម្ពុជា ប្រជាជាធិបតេយ្យ ដែលមានលោក សាឡុតស ហៅ ប៉ុលពត ជាមេដឹកនាំ បានប្រែក្លាយប្រទេស ទៅជាសង្គមទាសករ។ ប៉ុលពត សម្រេច គោលដៅរបស់ខ្លួនបានមួយតំណាក់ទៀត គឺលុបបំបាត់បាននូវ សាសនា វត្តអារាម មន្ទីរពេទ្យសាលារៀន។
ប៉ុលពត សម្រេចបាន នូវសុបិនរបស់គាត់គឺ កម្ពុជាឆ្នាំសូន្យ គឺឲ្យស្របនឹង រដ្ឋធម្មនុញ្ញ ឆ្នាំ១៩៧៦ ។ ប្រជាជនណា មិនអាចជំរៈបានរបបសង្គមចាស់នឹងត្រូវកំទេច ។ ជនណានៅមានគំនិត វប្បធម៌ជឿនលឿន នឹងត្រូវចាត់ទុកជាខ្មាំងរបស់ បដិវត្ត គ្រួសាររបស់ពួកគេ នឹងត្រូវយកទៅ អប់រំលត់ដំ ក្នុងជំរុំពលកម្ម ហើយបើមិនអាចអប់រំបាននឹងត្រូវកំទេចចោល។
បើតាមការស្រាវជ្រាវដោយ កំណត់ហេតុនិពន្ធ របស់អ្នកកាសែតបរទេស ចំនួន ២នាក់ គឺ Grant Evans និង Kelvin Rowley នៅ ១៩៨៤ បានស្រង់គោលនយោបាយជាតិនៅ ឆ្នាំ១៩៧៨ របស់ប៉ុលពតមកចុះផ្សាយថា ៖ “យើងកំពុងកសាងរបបសង្គមមួយដោយមិនយកគំរូតាម ប្រទេសណាមួយនោះទេ។ យើងចង់មានបទពិសោធន៍ ដោយខ្លួនយើង ដែលចេញពីការតស៊ូរំដោះប្រទេស គឺជាបទពិសោធន៍របស់យើង ដ៏អស្ចារ្យ។ យើងមិនឲ្យមានមហាវិទ្យាល័យ សាកលវិទ្យាល័យ នៅក្នុងគំនិតជាតិនិយមរបស់យើង។ បើប្រទេសពុំមាន ចរាចរសាច់ប្រាក់ គ្មានទីផ្សារ គ្មានមុខជំនួញ មានន័យថាយើង បានកសាងសង្គមមួយ ផ្ដល់សេរីភាពវណ្ណៈស្មើភាព ទៅឲ្យ ប្រជាជន ទៅឲ្យកសិករ។ ប្រជាជនប្រហែល បីលាននាក់ ជាភាសសឹក ពួកគេ បានធ្វើសមាហរណកម្មមកជនបទយើង បានផ្ដល់ឲ្យពួកគេ នូវ ស្ថានភាពរស់នៅមានភាពស្មើគ្នា ដូចកសិករ នៅពេលនោះ ប្រទេស របស់យើង ប្រែក្លាយជារបបសង្គមនិយម មួយបែបថ្មី”។ យ៉ាងហោចណាស់ក៏ប៉ុលពត ជាមេដឹកនាំម្នាក់គត់ នៅកម្ពុជា ដែលមាននិន្នាការដ៏ជិតស្និត ជាមួយមេដឹកនាំចិនម៉ៅសេងទុង ។ រាល់លទ្ធិ និងរបៀបគ្រប់គ្រងប្រទេសរបស់ចិន ក្នុងរាជកាលរបស់ មេដឹកនាំម៉ៅត្រូវបាន ប៉ុលពតយកមអនុវត្ត។
កំណត់ហេតុនិពន្ធរបស់ អ្នកនិពន្ធបានសំណេរ និងមានអត្ថន័យដូចនេះ ថា៖ នៅឆ្នាំ ១៩៧៦ ប្រទេស ត្រូវបានប្ដូរឈ្មោះជាថ្មី ទៅជាកម្ពុជា ប្រជាធិបតេយ្យ។ សម្ដេចព្រះនរោត្តម សីហនុ បានយាងចេញពីតំណែង និងត្រូវឃុំព្រះកាយ នៅក្នុងរាជវាំង។
លោក ខៀវ សំផន បានតែងតាំងជំនួស ព្រះអង្គក្នុងឋានៈជា ប្រមុខរដ្ឋផ្លូវការហើយប៉ុលពត ជានាយករដ្ឋមន្ត្រី។ ផែនការណ៍បួនឆ្នាំ ត្រូវបានបង្កើតឡើង ដើម្បី ដឹកនាំប្រទេសមួយក្នុងសម័យកាល ធ្វើសមូហភាពវូបនីយកម្ម មានន័យថាកំទេចចោលរបបឯកជន ទ្រព្យសម្បតិ គោល ក្របី ដីស្រែចំការ ដាក់ជាទ្រព្យរួមរបស់រដ្ឋ។
ក្រុមគ្រួសារមិនអាចរស់នៅរួមគ្នា គេត្រូវបំបែក ចូលទៅក្នុងសហករ គឺក្នុងគោល ដៅរបស់បក្ស និងរដ្ឋ ធ្វើស្រែឲ្យបានផលបីតោន ក្នុងមួយហិចតា។ ប៉ុន្តែផែនការនេះ ត្រូវបានទាញទំលាក់ប្រទេស ចូលទៅក្នុងភពខៅ្មងងឹត មួយ គឺកសិករក្លាយជាទាសកររបស់បក្សគុម្មុយនិស្តបដិវត្តកម្ពុជា។
នៅក្នុងប្រទេសចិនក្រោយ មានបដិវត្តវប្បធម័ឮ និងក្រោយពី មេដឹកនាំម៉ៅ ទទួលមរណៈភាព។ ប៉ុលពតបានតាំងខ្លួន គាត់ជាមេដឹកនាំ ម៉ៅសេងទុងនៅកម្ពុជា។ ទ្រឹស្ដីមួយត្រូវប៉ុលពត យកមកអនុវត្ត គឺកំទេចជំងឺផ្ទៃក្នុងបក្ស មានន័យថាត្រូវកំទេចជនណា ដែលប្រឆាំងនឹងការកែទំរង់របស់បក្ស ត្រូវគេលាបពណ៌ជាជនក្បត់ ក្រោយពាក្យនេះ ប្រែក្លាយជាជនក្បត់អង្គការ។
នៅឆ្នាំ១៩៧៦ ប្រជាជនកម្ពុជា រាប់រយពាន់នាក់ ត្រូវគេធ្វើទារុណកម្ម និងសម្លាប់ នៅមន្ទីរសន្តិសុខ ឬមន្ទីរសន្តិបាល។ នៅខែឧសភា ១៩៧៦ ប៉ុលពត និងបក្សគុម្មុយនិស្តកម្ពុជា ចាប់ផ្ដើមបង្កើត មន្ទីរសន្តិបាល ស២១ អតីតវិទ្យាល័យទួលស្លែង នៅក្នុងទីក្រុងភ្នំពេញ។
គោលដៅ នៃការបង្កើត ស២១ គឺសំដៅ ចាប់ជនក្បត់អង្គការមកសួរចម្លើយនៅទីនោះ។ ស២១ ឬគុកទួលស្លែង ត្រូវបានដាក់ឲ្យស្ថិតនៅក្រោម ការគ្រប់គ្រងរបស់កម្មាភិបាលជាន់ខ្ពស់ របស់បក្សគុម្មុយនិស្ត គឺកាំងហ្គិចអៀវ ហៅឌុច ដែលមានជិវិតមកដល់ពេលនេះ។
ទោះជាបែបណារបបកម្ពុជាប្រជាធិបតេយ្យ បានធ្វើឲ្យឈាម របស់ខ្មែរ ជិតពីរលាននាក់បានស្លាប់ ដោយ ការធ្វើទារុណកម្ម ការបង្អត់ បាយ ស្លាប់ដោយជំងឺ ការធ្វើពលកម្មដោយបាក់កំលាំង ដែលជាបុព្វហេតុមកពីការផ្ដួលរំលំរបបសាធារណៈខ្មែរ។ ប្រវត្តិ សាស្ត្រ ខ្មែរ និងពិភពលោកចាត់ទុកថាជាឆ្នាំសូន្យ និងពិភពដ័ខ្មៅងងឹត នៃប្រទេសកម្ពុជា ដែលគេមិនត្រូវឲ្យដានប្រវត្តិសាស្ត្រដ៏ខ្មៅងងឹតនេះ កើតឡើងវិញឡើយ៕
---------សំរាប់ពត៏មានបន្ថែមសូមចូលទៅកាន់ http://vodhotnews.com
No comments:
Post a Comment